រុស្ស៊ី សន្យាផ្ដល់វ៉ាក់សាំងប្រឆាំងមេរោគកូវីដ១៩ ដល់កម្ពុជា

ដោយ៖ យូ វីរៈ | ថ្ងៃព្រហស្បតិ៍ ទី១ ខែតុលា ឆ្នាំ២០២០ |

729

ភ្នំពេញ៖ រដ្ឋាភិបាលរុស្សី បានសន្យាផ្ដល់វ៉ាក់សាំងប្រឆាំងមេរោគកូវីដ១៩ ក្នុងកម្រិតណាមួយ ដល់ប្រទេសកម្ពុជានាពេលខាងមុខនេះ ខណៈវ៉ាក់សាំងនេះ ត្រូវបានក្រសួងសុខាភិបាលប្រទេស រុស្ស៊ីទើបចុះបញ្ជីនាពេលកន្លងទៅនេះ។ នេះបើតាមការបញ្ជាក់របស់លោក ណី សំអុល អគ្គនាយក នៃអគ្គនាយកដ្ឋានអឺរ៉ុប អាមេរិក អាហ្វ្រិក មជ្ឈិមបូព៌ា និងជាអ្នកនាំពាក្យរងក្រសួងការបរទេសកម្ពុជា។

ក្រោយជំនួបរវាងឯកឧត្ដម ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីការបរទេសកម្ពុជា ជាមួយលោក Anatoly Borovik ឯកអគ្គរដ្ឋទូតរុស្ស៊ីប្រចាំកម្ពុជា នៅព្រឹកថ្ងៃទី០១ តុលានេះ លោក ណី សំអុល បានបញ្ជាក់ថា នៅក្នុងកិច្ចជំនួបនោះភាគីទាំងពីរ បានពិភាក្សាគ្នាជាច្រើនទាក់ទងនឹងកិច្ចសហប្រតិបត្តិការទ្វេភាគីរវាងប្រទេសកម្ពុជា និងប្រទេសរុស្ស៊ី។

លោក ណី សំអុល បានបន្តទៀតថា នៅក្នុងកិច្ចជំនួបនោះ ឯកឧត្តមឧបនាយករដ្ឋមន្ត្រី និងលោកឯកអគ្គរដ្ឋទូតក៏បានលើកឡើងផងដែរ អំពីបញ្ហាមេរោគកូវិដ១៩ ដែលពិភពលោកកំពុងរីករាលដាលនាពេលបច្ចុប្បន្ននេះ។

បើតាមលោក ណី សំអុល ដដែលបានបន្ថែមទៀតថា ការផ្តល់នូវវ៉ាក់សាំងការពារមេរោគកូវិដ១៩ក្នុងកម្រិតណាមួយពីសំណាក់ប្រទេសរុស្ស៊ីដល់ប្រទេសកម្ពុជានោះគឺក្នុងគោលបំណងមនុស្សធម៌ និងមួយផ្នែកទៀត គឺពាណិជ្ជកម្មតាមរយៈការដោះដូរជាដើមនោះ៕ ប្រភព៖ BTVNews