គ.ជ.ប គ្រោងលុបឈ្មោះអ្នកបោះឆ្នោតជាង១០ម៉ឺននាក់ ខណៈអ្នកចុះឈ្មោះថ្មីត្រូវបានប៉ាន់ប្រមាណជាង ៤០ម៉ឺននាក់

ដោយ៖ យូ វីរៈ | ថ្ងៃសុក្រ ទី៣០ ខែកញ្ញា ឆ្នាំ២០២២ |

479

ភ្នំពេញ៖ គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប គ្រោងលុបឈ្មោះអ្នកបោះឆ្នោតចេញពីបញ្ជីជាង ១០ម៉ឺននាក់ ក្នុងពេលធ្វើបច្ចុប្បន្នភាពទៅលើបញ្ជីបោះឆ្នោត និងការចុះឈ្មោះបោឆ្នោតឆ្នាំ២០២២ ចាប់ពីថ្ងៃទី២០ ខែតុលាខាងមុខនេះ ខណៈចំនួនអ្នកចុះឈ្មោះថ្មី ត្រូវបានប៉ាន់ប្រមាណជាង ៤០ម៉ឺននាក់។

ថ្លែងក្នុងកិច្ចប្រជុំជាមួយភាគីពាក់ព័ន្ធនៅព្រឹកថ្ងៃទី៣០ ខែកញ្ញានេះ ឯកឧត្តម នុត សុខុម អនុប្រធាន គ.ជ.ប បានឱ្យដឹងថា ការចុះឈ្មោះថ្មីសម្រាប់ប្រជាពលរដ្ឋខ្មែរដែលទើបគ្រប់អាយុ១៨ឆ្នាំ មានជាង១៨ម៉ឺននាក់ និង អ្នកផ្លាស់លំនៅ ឬទីសំណាក់ចូលក្នុងឃុំ សង្កាត់ថ្មីជាង៧ម៉ឺន៨ពាន់នាក់។ ឯកឧត្តម មានប្រសាសន៍ថា «ការចុះឈ្មោះបោះឆ្នោតតាមឃុំ សង្កាត់ នឹងចាប់ផ្តើមពីថ្ងៃទី២០ ខែតុលា ដល់ថ្ងៃទី៨ ខែធ្នូឆ្នាំ២០២២។ ការចុះឈ្មោះបោះឆ្នោត មានគោលដៅ ដើម្បីធានាសិទ្ធិបោះឆ្នោតរបស់ប្រជាពលរដ្ឋ ដែលបានបំពេញ លក្ខខណ្ឌគ្រប់គ្រាន់តាមច្បាប់ តាមរយៈការកសាងឱ្យបាននូវបញ្ជីបោះឆ្នោត ដែលមានភាពពេញលេញ ត្រឹមត្រូវ មានបច្ចុប្បន្នភាព និងប្រកបដោយសុវត្ថិភាព។ ជាមួយគ្នានេះ បញ្ជីបោះឆ្នោតឆ្នាំ២០២២ នឹងត្រូវ ប្រើប្រាស់ក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលនឹងត្រូវធ្វើនៅថ្ងៃទី២៣ ខែកក្កដា ឆ្នាំ២០២៣ខាងមុខ»។

សូមបញ្ជាក់ថា ការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតប្រចាំឆ្នាំ នៅតាមឃុំ-សង្កាត់ ទូទាំងប្រទេស គឺសំដៅលើប្រជាពលរដ្ឋខ្មែរដែលទើបគ្រប់អាយុ១៨ឆ្នាំ និងមិនទាន់បានចុះឈ្មោះបោះឆ្នោត ពីមុនមក ព្រមទាំងអ្នកដែលបានផ្លាស់លំនៅ ឬទីសំណាក់ចូលក្នុងឃុំ សង្កាត់ថ្មី ហើយចង់ចុះឈ្មោះ បោះឆ្នោតថ្មី នៅកន្លែងបច្ចុប្បន្នដែលខ្លួនកំពុងរស់នៅ។ ក្នុងពេលធ្វើបច្ចុប្បន្នភាពនេះ ក៏មានការអនុញ្ញាត ឱ្យមានការសុំកែតម្រូវឈ្មោះ ឬទិន្នន័យរបស់អ្នកបោះឆ្នោត ដោយផ្អែកលើឯកសារសំអាងត្រឹមត្រូវ។ ដោយឡែក ការលុបឈ្មោះអ្នកបោះឆ្នោតចេញពីបញ្ជី សំដៅលើអ្នកទទួលមរណភាព និងអ្នកដែលត្រូវបាន ដកសិទ្ធិបោះឆ្នោតបណ្តោះអាសន្ន។

គិតត្រឹមថ្ងៃទី៣០ ខែកញ្ញានេះ គ.ជ.ប បានសហការជាមួយអាជ្ញាធរឃុំ-សង្កាត់ ជាពិសេសមេភូមិ ចុះចែក លិខិតអញ្ជើញជូនដល់ប្រជាពលរដ្ឋបានជាង៤លាន៥៨ម៉ឺននាក់ ស្មើនឹង៤៩.៧៦ភាគរយ នៃចំនួនលិខិត អញ្ជើញដែល គ.ជ.ប បានបោះពុម្ភ។ ការងារចែកលិខិតអញ្ជើញនេះ នៅតែបន្តរហូតដល់ថ្ងៃទី១៩ ខែតុលា ឆ្នាំ២០២២៕