ប្រធាន គ.វ.ក-១៩ រម្លឹកដល់ក្រុមអាទិភាពជួរមុខត្រៀមទៅទទួលការចាក់វ៉ាក់សាំងកូវីដ១៩ ដូសទី៥

ដោយ៖ យូ វីរៈ | ថ្ងៃចន្ទ ទី២៣ ខែឧសភា ឆ្នាំ២០២២ |

463

ភ្នំពេញ៖ នៅថ្ងៃទី២៣ ខែឧសភានេះ លោកជំទាវវេជ្ជបណ្ឌិត ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស មានប្រសាសន៍ថា ទោះបីបច្ចុប្បន្នស្ថានភាពជំងឺកូវីដ-១៩ មានភាពល្អប្រសើរក្តី តែការចាក់វ៉ាក់សាំងកូវីដ-១៩ នៅតែជាឧបករណ៍ដ៏សំខាន់បំផុត សម្រាប់បុគ្គលគ្រប់ៗ ការពារខ្លួនទប់ទល់នឹងការវាយលុកធ្ងន់ធ្ងរពីជំងឺកូវីដ-១៩ និងកាត់បន្ថយអត្រាមរណៈភាពបានជាអតិប្បរិមា។

លោកជំទាវវេជ្ជបណ្ឌិត បានក្រើនរម្លឹកដល់មន្ត្រីជួរមុខ ព្រមទាំងក្រុមអាទិភាព ត្រៀមទៅទទួលការចាក់វ៉ាក់សាំងដូសទី៥ ដែលចាប់ផ្តើមពីថ្ងៃទី៩ខែមិថុនា ខាងមុខនេះ ហើយចំពោះពលរដ្ឋមិនចាក់វ៉ាក់សាំងដូសជំរុញទី៣ ទី៤ រួសរាន់ទៅទទួលការចាក់វ៉ាក់សាំងកូវីដ-១៩។ លោកជំទាវបញ្ជាក់ថា ការចាក់វ៉ាក់សាំងដូសទី៥នេះ នឹងប្រើប្រាស់វ៉ាក់សាំងជំនួយពីប្រទេសចិន ប្រទេសឥណ្ឌា និងប្រទេសអ៊ីតាលីជាដើម។

យោងតាមសេចក្តីជូនព័ត៌មានរបស់គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ (គ.វ.ក.១៩) បានបង្ហាញថា យោងចំណារឯកភាពរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ចុះថ្ងៃទី២០ខែឧសភា ឆ្នាំ២០២២ គ.វ.ក-១៩ នឹងចាប់ផ្តើមចាក់វ៉ាក់សាំងទី៥ ជូនមន្រ្តីជួរមុខ និងក្រុមគោលដៅអាទិភាព ចាប់ពីថ្ងៃទី០៩ ខែមិថុនា ឆ្នាំ២០២២ តទៅ នៅមន្ទីរពេទ្យថ្នាក់ជាតិ និងថ្នាក់ក្រោមជាតិ ដែលការសម្របសម្រួលពីអាជ្ញាធរមូលដ្ឋាន៕

ពាក្យគន្លឹះទាក់ទង