ក្រសួងសុខាភិបាល៖ អ្នកប៉ះពាល់ជាមួយរដ្ឋមន្ត្រីការបរទេសហុងគ្រី នឹងត្រូវធ្វើតេស្តរកវីរុសកូវីដ១៩ ៣ដងទៀត បន្ទាប់ពីធ្វើតេស្តលើកទី១ អវិជ្ជមាន

ដោយ៖ យូ វីរៈ | ថ្ងៃសុក្រ ទី៦ ខែវិច្ឆិកា ឆ្នាំ២០២០ |

1,226

ភ្នំពេញ៖ ក្រសួងសុខាភិបាលបានប្រកាសឲ្យដឹងថា ការធ្វើតេស្តអ្នកប៉ះពាល់ជាមួយរដ្ឋមន្ត្រីការបរទេសហុងគ្រី សរុបមានចំនួន ៨៤០នាក់ហើយ គឺអវិជ្ជមានវីរុសកូវីដ១៩ទាំងអស់ តែ ធ្វើត្រូវបន្តធ្វើតេស្ត ៣ដងទៀត និងធ្វើចត្តាឡីស័កនៅតាមគេហដ្ឋានឲ្យបានត្រឹមត្រូវ។

យោងតាមសេចក្ដីជូនព័ត៌មានរបស់ក្រសួងសុខាភិបាល បានឲ្យដឹងថា ការធ្វើតេស្តអ្នកប៉ះពាល់ជាមួយឯកឧត្ដម រដ្ឋមន្ត្រីការបរទេស និងពាណិជ្ជកម្មហុងគ្រី នៅថ្ងៃទី៥ ខែវិច្ឆិកា ឆ្នាំ២០២០ មានចំនួន ២១២នាក់(ក្នុងនេះ មានជនជាតិហុងគ្រី១នាក់) ដែលទទួលបានលទ្ធផលពីវិទ្យាស្ថានប៉ាស្ទ័រកម្ពុជា គឺអវិជ្ជមានវីរុសកូវីដ១៩ទាំងអស់។ ដូច្នេះចំនួនសរុបអ្នកប៉ះពាល់ទាំងអស់មាន ៨៤០នាក់ សម្រាប់ថ្ងៃទី៤ និងទី៥ ខែវិច្ឆិកា ឆ្នាំ២០២០ ដែលមានលទ្ធផលអវិជ្ជមានវីរុសកូវីដ១៩ទាំងអស់។

ក្រសួងសុខាភិបាលបានឲ្យដឹងទៀតថា ទោះជាយ៉ាងនេះក្ដី ក្រសួងសុខាភិបាល បានណែនាំដល់អ្នកប៉ះពាល់ទាំងអស់ដែលមានលទ្ធផលតេស្តលើកទី១ អវិជ្ជមានវីរុសកូវីដ១៩ ត្រូវបន្តធ្វើចត្តាឡីស័កនៅតាមគេហដ្ឋានឲ្យបានត្រឹមត្រូវទៅតាមការណែនាំរបស់ក្រសួង ហើយសូមវិលត្រឡប់មកធ្វើតេស្តឡើងវិញចំនួន៣ដងទៀត នៅវិមានមិត្តភាព នៃទីស្ដីការគណៈរដ្ឋមន្ត្រី ដែលមានរៀបចំទីតាំងយកវត្ថុសំណាកសម្រាប់ធ្វើតេស្តរកវីរុសកូវីដ១៩ ចាប់ពីម៉ោង៧ព្រឹក ទៅតាមកាលបរិច្ឆេទដូចខាងក្រោម៖

លើកទី២ ថ្ងៃទី៩ ខែវិច្ឆិកា ឆ្នាំ២០២០
លើកទី៣ ថ្ងៃទី១៤ ខែវិច្ឆិកា ឆ្នាំ២០២០
លើកទី៤ ថ្ងៃទី១៨ ខែវិច្ឆិកា ឆ្នាំ២០២០

សូមជម្រាបជូនថា នៅថ្ងៃទី៦ ខែវិច្ឆិកា នេះ ក្រសួងសុខាភិបាលបានប្រកាសថា មិនមានករណីវិជ្ជមានវីរុសកូវីដ១៩ថ្មី និងមិនមានករណីជាសះស្បើយទេ។ គិតត្រឹមម៉ោង៧ព្រឹកថ្ងៃទី៦ខែវិច្ឆិកាឆ្នាំ២០២០ អ្នកមានវីរុសកូវីដ១៩ សរុប ២៩២នាក់ អ្នកព្យាបាលជាសះស្បើយសរុប ២៨៦នាក់ អ្នកកំពុងសម្រាកព្យាបាលមានចំនួន ៦នាក់ និងមិនមានអ្នកស្លាប់ទេ៕