អ្នកនាំពាក្យក្រសួងយុត្តិធម៌ថ្លែងថា បទញុះញង់ក្នុងក្រមព្រហ្មទណ្ឌ មិនមែនជាការរំលោភសេរីភាព នៃការបញ្ចេញមតិនោះទេ

ដោយ៖ យូ វីរៈ | ថ្ងៃអាទិត្យ ទី២២ ខែវិច្ឆិកា ឆ្នាំ២០២០ |

1,040

ភ្នំពេញ ៖ តាមរយៈហ្វេសប៊ុកថ្ងៃទី២២វិច្ឆិកានេះលោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លើកឡើងថា បទញុះញង់ក្នុងក្រមព្រហ្មទណ្ឌ មិនមែនជាការរំលោភសេរីភាព នៃការបញ្ចេញមតិនោះទេ។

ការលើកឡើងយ៉ាងដូច្នេះគឺបន្ទាប់ពីវិទ្យុអាស៊ីសេរីបានផ្សាយថា មន្ត្រីនៃសង្គមស៊ីវិល គឺអង្គការសិទ្ធិមនុស្សលីកាដូ និងអង្គការមូលនិធិខ្លូនី មានទីតាំងនៅអាមេរិក ស្នើឲ្យរាជរដ្ឋាភិបាលកម្ពុជាលុបចោលបទញុះញង់ចេញពីក្រមព្រហ្មទណ្ឌ។

លោក ជិន ម៉ាលីន បានសរសេរនៅហ្វេសប៊ុកថា « ម្យ៉ាងដែរស្រុកខ្ញុំ ដល់ពេលប្រព្រឹត្តបទល្មើសច្រើនពេកទៅ គេចអត់រួចពីសំណាញ់ច្បាប់ បែជានាំគ្នារិះគន់ និងទាមទាឱ្យលុបច្បាប់ចោល។ Sick!»។

មន្ត្រីអ្នកនាំពាក្យបានបញ្ជាក់ប្រាប់ថា បទញុះញង់ក្នុងក្រមព្រហ្មទណ្ឌ មិនមែនជាការរំលោភសេរីភាព នៃការបញ្ចេញមតិនោះទេ ព្រោះសេរីភាព នៃការបញ្ចេញមតិមិនមែនជាសេរីភាព នៃការផ្សព្វផ្សាយព័ត៌មានមិនពិត បំផ្លើស បំភ្លៃ បំពានដល់សិទ្ធិសេរីភាពអ្នកដ៏ទៃ និងប៉ះពាល់ដល់សណ្តាប់ឆ្នាប់សាធារណៈ និងសន្តិសុខសង្គមនោះទេ។ បទញុះញង់ដូចគ្នានេះ ក៏មានបញ្ញតិ្តនៅក្នុងច្បាប់ព្រហ្មទណ្ឌនៃបណ្តាប្រទេសជឿនលឿន និងប្រជាធិបតេយ្យដ៏ទៃទៀតផងដែរ។

លោកបានបន្តថា ការរៀបចំឱ្យមានបញ្ញត្តិប្រភេទបទល្មើសច្រើនក្នុងក្រមព្រហ្មទណ្ឌ គឺដើម្បីការពារថែរក្សាសិទ្ធិសេរីភាពបុគ្គល និងសណ្តាប់ឆ្នាប់សាធារណៈ ឆ្លើយតបទៅនឹងការវិវឌ្ឍលើគ្រប់វិស័យ និងទិដ្ឋភាពសង្គម។ ការលុបចោលបទល្មើសញុះញង់នេះ នឹងនាំមកនូវភាពអនាធិបតេយ្យ និងលើកទឹកចិត្តឱ្យមានការបញ្ចេញមតិដោយបំពាន និងគ្មានការទទួលខុសត្រូវ ប៉ះពាល់ដល់សន្តិសុខសង្គម សណ្តាប់ធ្នាប់សាធារណៈ និងសិទ្ធិសេរីភាពបុគ្គល។

លោក ជិន ម៉ាលីន បានលើកឡើងទៀតថា ក្នុងនាមជាពលរដ្ឋដែលមានការទទួលខុសត្រូវ និងបើមិនចង់ប្រឈមមុខតាមផ្លូវច្បាប់ទៀត ពួកគេគួរតែឈប់ធ្វើសកម្មភាពដែលជាអំពើល្មើសច្បាប់ក្រោមរូបភាព និងលេសនៃសេរីភាពមញ្ចេញមតិ ជាជាងការនាំគ្នារិះគន់ និងទាមទាឱ្យមានការកែប្រែ ឬលុបចោលបញ្ញត្តិនៃច្បាប់នេះ៕