ថ្ងៃនេះ ក្រសួងសុខាភិបាលប្រកាសថាមានអ្នកជំងឺកូវីដ១៩ ០២នាក់ទៀតបានជាសះស្បើយ

ដោយ៖ យូ វីរៈ | ថ្ងៃព្រហស្បតិ៍ ទី២៤ ខែធ្នូ ឆ្នាំ២០២០ |

884

ភ្នំពេញ៖ ក្រសួងសុខាភិបាល នៅព្រឹកថ្ងៃទី២៤ ខែធ្នូ ឆ្នាំ២០២០ បានចេញសេចក្ដីជូនព័ត៌មានមួយស្ដីពីស្ថានភាព នៃជំងឺកូវីដ១៩ ដោយបានបញ្ជាក់ថា មានករណីជាសះស្បើយចំនួន ០២នាក់ ក្នុងនោះ អ្នកពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ០១នាក់ ឯ ០១នាក់ទៀតជាអ្នកដំណើរចូលមកកម្ពុជា និងមិនមានករណីឆ្លងថ្មីទេ សម្រាប់ថ្ងៃទី២៣ ខែធ្នូ ឆ្នាំ២០២០។

១. ករណីជាសះស្បើយចំនួន ០១នាក់ ជាអ្នកពាក់ព័ន្ធព្រឹត្តការណ៍សហគមន៍២៨វិច្ឆិកា៖ ស្ត្រីជនជាតិខ្មែរអាយុ ៣០ឆ្នាំ មានអាសយដ្ឋានស្នាក់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ត្រូវបានព្យាបាលជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ១៩ ចំនួន០២លើក ត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។

២. ករណីជាសះស្បើយចំនួន ០១នាក់ ជាអ្នកដំណើរចូលមកកម្ពុជា៖ បុរសជនជាតិខ្មែរ-អាមេរិក អាយុ ៥៤ឆ្នាំ មានអាសយដ្ឋានស្នាក់នៅសង្កាត់ផ្សារថ្មី ខណ្ឌដូនពេញ ជាអ្នកដំណើរមកពីប្រទេសចិន ត្រូវបានព្យាបាលជាសះស្បើយ ដោយបានទទួលលទ្ធផលតេស្ត អវិជ្ជមានវីរុសកូវីដ១៩ ចំនួន ០២លើក ត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។

សូមជម្រាបជូនថា អ្នកជំងឺកូវីដ១៩ ដែលបានរកឃើញពាក់ព័ន្ធព្រឹត្តិការណ៍សហគមន៍២៨វិច្ឆិកា ពីថ្ងៃទី២៨ ខែវិច្ឆិកា ដល់ថ្ងៃទី២៣ ខែធ្នូ ឆ្នាំ២០២០ សរុបមានចំនួន ៤១នាក់ ដែលក្នុងចំនួននេះ មានអ្នកជាសះស្បើយចំនួន ៣៣នាក់ហើយ។

សូមបញ្ជាក់ថា គិតត្រឹមព្រឹកថ្ងៃទី២៤ ខែធ្នូ ឆ្នាំ២០២០នេះ កម្ពុជាមានអ្នកមានវីរុសកូវីដ១៩ សរុបចំនួន ៣៦៣ នាក់ (ករណីនាំចូល ៣២២, ព្រឹត្តិការណ៍សហគមន៍ ២៨វិច្ឆិកា ៤១នាក់) ក្នុងនោះអ្នកជាសះស្បើយមានចំនួន ៣៥១នាក់ អ្នកកំពុងសម្រាកព្យាបាលនៅមន្ទីរពេទ្យចំនួន ១២នាក់ និងមិនមានអ្នកស្លាប់ទេ៕